సుప్రీంకోర్టులో జాక్వెలిన్ ఫెర్నాండెజ్ కు ఎదురుదెబ్బ... విచారణ ఎదుర్కోవాల్సిందే!

బాలీవుడ్ నటి జాక్వెలిన్ ఫెర్నాండెజ్‌కు సుప్రీంకోర్టులో గట్టి ఎదురుదెబ్బ తగిలింది. ఆర్థిక మోసగాడు సుకేష్ చంద్రశేఖర్‌కు సంబంధించిన రూ. 215 కోట్ల మనీ లాండరింగ్ కేసులో తన పేరును తొలగించాలని కోరుతూ ఆమె దాఖలు చేసిన పిటిషన్‌ను సర్వోన్నత న్యాయస్థానం సోమవారం కొట్టివేసింది. ఈ కేసు విచారణ నుంచి ఆమెకు ఎలాంటి మినహాయింపు ఇవ్వలేమని స్పష్టం చేసింది.

ఈడీ నమోదు చేసిన కేసును రద్దు చేయాలన్న జాక్వెలిన్ అభ్యర్థనను గతంలో ఢిల్లీ హైకోర్టు తిరస్కరించింది. ఆ తీర్పును సవాలు చేస్తూ ఆమె సుప్రీంకోర్టును ఆశ్రయించారు. సోమవారం జస్టిస్ దీపాంకర్ దత్త, జస్టిస్ ఏజీ మాసిహ్‌లతో కూడిన ధర్మాసనం ఈ పిటిషన్‌పై విచారణ జరిపింది. జాక్వెలిన్ తరఫున సీనియర్ న్యాయవాది ముకుల్ రోహత్గీ వాదనలు వినిపించారు. సుకేష్ నుంచి బహుమతులు అందుకున్న మాట వాస్తవమే అయినా, అది దోపిడీ చేసిన డబ్బని ఆమెకు తెలియదని వాదించారు. ప్రధాన దోపిడీ కేసులో జాక్వెలిన్ కేవలం సాక్షి మాత్రమేనని, కాబట్టి పీఎంఎల్‌ఏ కింద నిందితురాలిగా చేర్చడం సరికాదని అన్నారు.

అయితే, ఈ వాదనలతో ధర్మాసనం ఏకీభవించలేదు. "స్నేహితుల మధ్య బహుమతులు ఇచ్చిపుచ్చుకోవడం సాధారణమే. కానీ, ఒకరు నేరస్థుడైతే, దాని పర్యవసానాలను ఎదుర్కోవాల్సి ఉంటుంది" అని వ్యాఖ్యానించింది. ట్రయల్ కోర్టులో అభియోగాల నమోదు దశలో తన నిర్దోషిత్వాన్ని నిరూపించుకునేందుకు వాదనలు వినిపించవచ్చని జాక్వెలిన్‌కు సూచించింది.

ఆర్థిక మోసగాడు సుకేష్ చంద్రశేఖర్ జైల్లో ఉంటూనే ఓ వ్యాపారవేత్త నుంచి రూ. 200 కోట్లకు పైగా వసూలు చేశాడన్నది ప్రధాన ఆరోపణ. ఈ దోపిడీ డబ్బుతో సుకేష్.. జాక్వెలిన్‌కు, ఆమె కుటుంబ సభ్యులకు సుమారు రూ. 10 కోట్ల విలువైన ఖరీదైన బహుమతులు ఇచ్చాడని ఎన్‌ఫోర్స్‌మెంట్ డైరెక్టరేట్ (ఈడీ) తన ఛార్జిషీట్‌లో పేర్కొంది. వీటిలో డిజైనర్ బ్యాగులు, వజ్రాభరణాలు, ఖరీదైన కారు వంటివి ఉన్నట్లు దర్యాప్తులో తేలింది. సుకేష్ ఒక నేరస్థుడని తెలిసి కూడా జాక్వెలిన్ అతడి నుంచి బహుమతులు స్వీకరించి, నేరపూరిత డబ్బు ద్వారా లబ్ధి పొందారని ఈడీ ఆరోపిస్తోంది. సుప్రీంకోర్టు తాజా తీర్పుతో ఆమె ఈ కేసులో విచారణను ఎదుర్కోక తప్పని పరిస్థితి ఏర్పడింది.